دَرّجْ باش تعالجْ

ها واحد السلام عليكم ! كانشكر العديد منكوم لي شجعوني من بعد قراءة التدوينات للي دازو ، وحتى دوك القدام للي بالانجليزية.. وحتى مكنتش باقي غانعاود نكتب بالدارجة و لكن درت بوجه هاد الناس ههه الصراحة أخجلتم تواضعنا

هادي شي يامات كانت البلاد مشغولة فواحد القضية دارت بووم.. ديال التدريس بالدارجة بلاصت العربية.. و ناضت مڭارعة ، فحال بارصا و الريال .. أنا بجوج تايعجبوني .. لأن اللغة العربية زوينة بزاف .. ديكشي سيكسي .. والدارجة عاود مستونية ، و كايجي بيها التطلاع حسن ! و لكن كيفما عرفتو دابا …عزيز عليا التخمام ، وبديت كانفكر فالدارجة و الطب. قهرتكوم بالطب ؟ كوشتو شدار فيا أنا هههه فنيت فيه شبابي .. !
نهار كانبداو الميدسين و حنا غير الفرونسي و ماشي تا فرونسي ديال بجوغ صا ڤا ؟ شي كلمات مايقد عليهوم غير إمينيم ! و فاش كاتدوز للتطبيق .. أراك لحريق الراس ! نتا قاري لاضياري ، لا توبركلوز، لو نير سياتيك ! أرا تشوفلك فلهدرة معا المريض كي غادير ترجم وتشرح هادشي لواحد جاي من راس الجبل، مقاري ما والو.. منِيضر صراحة. كاتبان فحال شي فرانصاوي تايهدر الانجليزية. غانعطيكم فهاد التدوينة شي أمثلة ديال هاد الحالات لي ماكايقريوهومش ليك .. تتشدهوم مع الحرفة.
حنا دايرين كي البوليس، كانشدو الواحد كانديرولو الاستنطاق و كانسولوهم على السوابق ديالهم . غير هو بزز عليه يڭول لينا الحقيقة هههه. فاش تانبداو نسولو بنادم ، كانسولوه على مجموعة ديال الأشياء لي مهمة و كاتساعد، ولكن باش يقدر يجاوبك خاصو يفهمك. اذا بغيت نسول شي شخص واش داوا على مرض السل، ڭلتيها ليه مثلا بالعربية هاكا غايتفرج فيك مزيان ، ڭلتيها بالفرونسي غايضربك.. خاصك اذن الحل! فأغلب الحالات كاتسولو “عمرك داويتي على وسخ الصدر؟” ههههه غريبة هاد النوطة ياك ؟ واحد 60% ديال الناس تايفهمو هادي.. شي لاخور لا.. خاصك شي لعبة من غير. كاتبقا تخمم و كاتڭوليه “عمرك خديتي دوا ديال ست شهور؟” .. غيرنا الخطة و ركزنا على الدوا باش نعرفو المرض ههه. شتو هادي كيف ساهلة و شحال تاتبدا تلعب باش يفهموك الناس. [ تحذير: هاد الجزء ديڭولاس، غير صالح للكيليميني] من الضروري تسول المريض للي كاتيشكا من شي حريق في الجهاز الهضمي على خلاصة هاد الجهاز، أي بلغة الجاحظ: الغائط. غاتڭولو سآهلة ! لا ضياري … ! صحيح كاين للي تايفهمها طايرة تبارك لله عليه ههه وكاين لي تايڭوليك “شنا هوا ؟” و هادو كتار.. عادة كانمشي مع كلمة إسهال مع شي حركات يدوية و تايفهمو هه .. و بزاف متيعرفوش شناهيا صريصرة .. ديكشي عندو علاقة بالمناطق واقيلا.. اذن فالحالات المستعصية كاتستعمل سپيسيال و كاتسولو “كيداير الخروج ديالك من اللور” هادي مكتخلي تا التباس.. وكاتحس براسك فخور فاش تايفهم.

كاين بزاف ديال المرضى كايتشكاو من لحريق ديال سياتيك .. نتوما تعرفوه هاكا تبارك لله وصلاعنبي عليكم ، ولكن المغاربة المتواضعين ما تايعرفوش آشنو هوا. هنا عاوتاني كاتبدا تخمم.. كاينة طبعا واحد الكلمة أغلب المغاربة تايفهموها هي “بوزلُّوم” .. غير ماتسولونيش على الايتيمولجيا ديالو حياتش معارفش ومباغيش نعرف هه. المهم اذا فهمك ، هداك نهار السعد، اذا استعصى عليه الأمر كاتڭوليه “عرق النِّسا”.. هآآا.. المضحك فالأمر أنه نهار ڭالو ليا هاد السمية فسروها لي على أساس ديك ” النسا” هي “النساء” و أنهم سماوه هاكا حيتاش تايتشكاو منو بالأخص العيالات. و لكن هذا خطأ ههه غير يسمح لينا الجنس اللطيف، فينما كانت شي مصيبة تانلسقوها فيكم هه. فاش درت البحث ديالي لقيت بلا ابن منظور في لسان العرب هو للي سماه هاكّا “لأن تأثير ألمه يُنسِى ما سواه”. زعما المغاربة ! مستعد يخترع قصة باش مايڭوليكش ماعارفش.
مادام جبدنا العيالات ندوزو نشوفو شي أسئلة كانطرحو فمصلحة ديال النساء. كنت فالمدونة السابقة تكلمت على هاد النقطة و لكن في الإعادة إفادة ههه . باش تاتسول السيدة ايمتا جاوها لي ريڭل كاتڭوليها “فوقاش آخر مرة جاك حق الشهر” ههه ولا لا مافهماتش ” فوقاش آخر مرة جاك الدم” هعهعهعهع . في إطار السوابق تانبغيو نعرفو واش فايت المرأة دارت فوص كوش.. أي إجهاض.. فنضركم شنو هو السؤال؟ كاتڭوليها ” واش فايت خصرتي” ماشي زعما بو نقشة ، سيكاتريس وخصر شي واحد.. هه لا ، واش فايت طيحتي.. كانستعملو تاهادي.
مجهود كبير كايتبدل غير الاستنطاق، قبل تا ما تقلب الواحد.. المشكل هو فاش تايجيك شي حد مكايدويش العربية… كايطلع معاك شي برد ..

كانوليو ديك ساعة نستعملو الحركات و الرسومات.. و حنا الآن في أطار العمل على مشروع لإدماج طريقة براي..ههه اذا سولتوني، كانضن خاص يتزاد فصل فالطب،مافيه لا امتحان لا والو غير تكالماو.. آه.. ولاد المدسين قراو غير يتزاد فصل صافي ناضو يحيحو.. هاذ المادة يكون فيها غير شي واحد واخا تا أنا ولا شي واحد من السبيطار للي يقري فن التواصل مع المرضى بالدارجة.. و على ما أظن كانت شي جمعية الطلاب فكلية الطب بالرباط صاوبو كُتيِّب فيه هاد الكلمات هادو بالنسبة للأشخاص للي عاد غايبداو التداريب ديالهم ، كانتمنا يكون مزال تايصايبوهوم.

خوتي ، نتمنا هاد التدوينة تساعد شوية البزاقيل للي عاد بداو، وتانتوما لا مشيتو لشي سبيطار وسمعتونا كاندويو هاكا، راه ماشي مسطيين، غير مضاربين مع الوقت.

بْزِي و عدِّي

السلام عليكم ! فاش تايجي الخير تايجي فمرة.. رجعت ليكوم اليوم أولا لأنه معندي مايدار.( مانكدبش عليكم في ذكرى المولد النبوي.. نهار أخر مانضمنش ليكم هههه..) وثانيا لأنه كاين واحد الموضوع تاهو ديما تانخمم فيه و هو مشكل مسكوت عليه بزاف فالمغرب
ربما البعض فيكم تايعرف أنه في الطب، عندنا واحد المصلحة إجبارية ندوزو منها، ثلاتة ديال السنوات على التوالي، ألا وهي ” مصلحة أمراض النساء و الولادة “ أولا بتعبير آخر غوانتانامو ، تازمامارت أو أي مركز تعذيب كاترعفو

ليوما غاندير الدور ديال حبوب منع الحمل و العازل الطبي و نخلعكوم مزيآان .. حيتاش بانلي هادشي مابقاش واكل. عدد الولادات فهاد البلاد وصل لواحد الحد لا يوصف ، و كانهدر غير على مدينة فاس للي كانزاول فيها العمل ديالي .. و بيني وبينكم معا ديكشي للي شفت فهاد السنين للي دزت تما ، ديك 37 مليون نسمة للي تايڭولو لينا .. و الله ماداخلا لي لدماغ. الواحد تايظن أنه مع التقدم و تطور دور المرأة في المجتمع، عدد الأطفال في كل أسرة تايقلال بحكم ظروف العمل، و وعي الأزواج. خطأ ! في ظل مزوالة العمل اليومي و المداومات فهاد المصلحة ، تاتكتشف بيلا هاد النساء راهوم قلال ، و مزال فوسط المدينة و في البادية كذلك النساء تأدي دور الفَرّان و القْنِية.. أي كاتعجن و تولد. هذي ماشي قلة احترام و لكن ملحوظة للأسف صحيحة. تانواجهو نساء والدين 11 ، 12 و جاية تولد 13 ! فرقة تبارك الله ديال كرة القدم و بمقاعد البدلاء ! و ياريت كون كانو تايجيو المستشفى، و يتبعو الحمل، ويديرو التلقيح، راه مانتعصبش عليهوم بزاف. ولكن للأسف تاتبقا باركا فدارها تاكا تبزيه. سمحو ليا ولكن فاش كايتعداو 10 تايولي تبان ليك الولادة فحال شي دونتيفريس .. برك و هو يخرج. أي مراة تاتجي حاملة كانسولهوها واحد السؤال باش تانعرفو بالضبط شحال باش حملات .. ” فوقاش آخر مرة جاك حق الشهر ؟ ” زعما لي ريڭل .. واحد النهار وحدة جاوباتني ” ما نعرف صبار نسول راجلي ..” هههه.. غاتقولو ليا ،نقص الوعي، نساء مقارينش، أجل صحيح. وهنا تايجي الدور ديالنا. تانشرحو ، تانفسرو ، تانصحو. و لكن والو. إذا المرأة كانت تاتولد بطريقة طبيعية فمصلحة طبية تانقللو شويا الخطورة، ولكن فاش تاتولد فالمنزل و كاتجي من بعد يومين أو ثلاتة بجروح في الفرج، و نزيف ،و التهابات..تاتبقا فيك و كتعصبك فنفس الوقت. أما فاش كاتكون والدة بعملية قيصرية جوج و ثلاتة ديال المرات.. و كاتجي حاملة مرة أخرى، علما أنه تم شرح الخطورة .. فاللهم إن هذا منكر! كانبقا نخمم أنا فين كاين المشكل. واش حنا كانقصرو و خصنا نزيدو فحملات التوعية للي راهوم كتار .. و لا المجتمع ديالنا هاكا داير.. و علاش هاد النساء الواعيات مايساعدوش في هذ الأمر.. ماكانلقاش جواب مقنع. و فواحد من هذا الأوقات ديال التفكير الميتافيزيقي للي تايشدني وانا فيا الجوع وناقص نعاس ، وعندي حريق الراس من صراخ النساء ( للي كانحييهم أكبر تحية و على رأسهم الأم ديالي .. للي من بعد مدرت أول توليد ديالي هذي سنتين ، فكرت فيها مباشرة .. لأنه الله يحسن ليهم العون! قوة و صبر و الله يسمح لينا من الواليدين) بداو تايبانو ليا بعض ملامح المشكل. قبل من نتطرق لهاذ الجزء ، كاين واحد الاشكالية كبيرة عندنا فهاد البلاد و خطيرة و لازم نتحدث عليها. الفتيات الأمهات ، الأمهات العازبات، للي حاملة بلا خبار دارهوم، الأم المغتصبة ، سميوها كيف بغيتو. يوميا ، وبلا مانديرو فيها مريم العذراء، وشعب الله المختار، كاين مئات العلاقات الجنسية ما بين دراري و البنات. و هاد العلاقات بعض المرة تاينتج عنهم حمل .. فحال كي قريتو فالعلوم الطبيعية و النشاط العلمي. و لكن للأسف المجتمع و الأسرة ماكايرحموش. مغاندخلش فالدين و نبدا نهلل ونحرم .. ولا نقول الغلط تايوقع، كاين ناس لي بالنسبة ليلهم العلاقة مع شخص آخر ماشي غلط غير هوما خاصهوم يكونو مستعدين للعواقب. كنتذكر واحد نهار كنت كندير تدريب فأحد المستوصفات، وخاصكوم تعرفو أن حبوب منع الحمل و العوازل الطبية متوفرة وبدون كلفة. ولكن الناس ماتايجيوش ياخدوهوم. ديك النهار عرفت علاش. واحد الشاب، شجاع ولا مقزدر فهموها كي بغيتو ، كان جا ياخد ما تيسر من العوازل الطبية. الدور ديال رجال و نساء الصحة هو النصح ، ولكن فيما هو علمي و ليس ديني. أرانا أسيدي جات واحد الممرضة مداتو ليه بواحد النظرة ديال المقت و الاحتقار.. و ڭالت ليه ” هادشي لي كادير راه حرام و عار.. و الله يهديك على نفسك” وهذشي فوسط الناس. الشاب خداهوم وانصرف وأنا متأكد أنه عمرو يرجع لديك المستوصف.. أنا معجبنيش الحال وڭلتها لديك الحاجة ” الشريفة سمحلي، ولا تاخديها مني قلة الصواب ( اللمسة الفاسية هه) ولكن ديكشي لي ڭلتي ليه راه مامزيانش. الدور ديالنا ماشي الحكم على الناس، بل فقط النصيحة. دابا غايڭول فدماغو بناقص ڭاع من هاذ العازل ايلا هاكا. وهذ الشي للي مابغيناش! الى غايديرها غايديرها اللهم يكون محمي.. وماشي قضية حمل ،حيتاش ديكشي بيد الله ، ولكن الأمراض المنقولة جنسيا..” .. فهمت شويا ديك النهار أنه عندنا تاحنا يد فهاد المشكل. هاد النساء هادو لي تيحملو كلشي تايسمح فيهوم.. هاذاك الشاب لي كان تايبان أمير وهو كان تايسعى غير مورا اللذة، فاش وصل ليها مشا. هادوك الصحابات لي تايخافو واليدهم يطبقو قانون معامن شفتك معامن شبهتك. و بطبيعة الحال الأسرة، لي مشبعة بقوانين مجتمع غابوي يدّعي التحفظ. شنو تايبقا أمام هاد البنت هادي؟ انتحار ؟ اجهاض؟ للي هو غير قانوني فالطب، و للي أنا متأكد كايدار فالنوار وفظروف غاتكون فظيعة تقدر تودي بحياتها. ولا تقبل الأمر ، ومحاولة ايجاد حل عقلاني.. لا. مع الأسف هاد لخرا مكادارش. و تيقو بيا، هاد النساء تايجيو يولدو عندنا بكثرة.. وبتخابعية .. كاين لي تاتزير على كرشها بسمطة باش مكاتبانش خارجة و هي فالدار..تصورو معاي. اذا كانلقاو راسنا ما بين نساء متزوجات تايولدو بالعشرات فظروف يرثى لها، نساء مغتصبات أو غير متزوجات تايحملو و يجهضو و يولدو فظروف غامضة، ومستوصفات مليئة بوسائل منع الحمل والعوازل الطبية. إذن فين كاين الخلل؟ المرأة لي عاد ولدات فاش تاتمشي دير التلقيح لولدها تادوز و لابد من مركز التنظيم الأسري، و تايتعطاو ليهم الحبوب ومع ذلك تايرجعو حاملات. تذكرت واحد القضية على هاد النقطة. كنا عطينا الحبوب لسيدة و رجعات من بعد مدة قصيرة حاملة ! أو! كيف هاذا يا ترى ههه ( كونان) سولتها ” الشريفة !كنا عطينا الكينات ياك؟ ” ” نعام أولدي” .. ” ايوا كنتي تاخديهم؟ حيتاش دابا راكي حاملة غريبة شوية هاد القضية” ” وا كان ديما تايخدهوم” .. ” هدا عليا ! كان؟ شكون هذا ا لالة؟” ” راجلي! “

الصآآعقة! ا كانت تتعطي لكينات لراجلها ! شبعاتو اوستروجين! فلول ڭلت وا لكلآخ المبين هذا ! من بعد فكرت و ڭلت بلي هاد سيدة ما قارياش.. اوستروجين بالنسبة ليها شي ماركة ديال صابون المواعن. !الخطأ فلي شرح ليها. ماشرحش بيما فيه الكفاية. الناس ديال الصحة عايتقلقو ويڭولو ليا ” واش نتا معانا ولا معاهم!” و اللي كان قرا التدوينة السابقة غايفهم علاش الشرح ماكايقدرش يكون مطول : الاكتظاظ
للأسف ديما كانسدق فحيط.. و كانلقا عذر لكل واحد.. وهي أعذار واقعية و معقولة ماشي مختلقة. و لحل هو جلوس جميع الأطراف و الوصول إلى حلول. كاين جمعيات للأمهات العازبات، ولكن مكرهتش يكون تنسيق بينتهم وبين المستشفيات، و لازم الناس ديال القانون تاهوما يقننو القضية ديال الإجهاض و للي دابا نرجع نتطرق ليه فتدوينة أخرى.. ولازم نرجعو حملات التوعية فوسائل الإعلام ديالنا . تعقلو على كينة الهلال والإشهار ديالها.. و لازم فوق كلشي أن التوعية تتم فلغة أو لهجة للي يفهمها كلشي.. لأن هذا مشكل تايبان عادي للبعض، أن المرأة تولد بزاف .. بعيدا عن أنه ليس دورها الوحيد في هاذ الحياة .. كاين لي غايڭول ليا واجب علينا عمار الأرض.. باش؟ الظروف فين تايعيشو هاد الناس بلكاد كاتسمح لشخص واحد يعيش فما أدراك بعشرة .. وهاد الأطفال هادو شحال منهوم غايدخلو يقراو؟ و شحال غايمشي يتستغل بأبغض الطرق فحرف يدوية، ولا النساء تعمل فالمنازل. المسألة ماشي مسألة عدد فحسب ولكن قضية حياة ، و ظروف حياة، و الحق فالتعليم..
و لكن فآخر المطاف كاتلقا راسك كاتخمم بوحدك .. والمسؤولين كايصاوبو التيجيڤي ، و المول و الپيستا ديال الفورمولا1 .. تافلخر نزلقو ونتفلقو فحال شوماخر الله يشوف من حالو. السلام عليكم